Þetta er ekkert annað en kynþokkafordómar!

Ekki get ég ímyndað mér hvaða skaða þessi kona sér fyrir sér að börn verði fyrir af því að sjá þessa mynd af Beyonce blessaðri. Er hún kannski hræddari um að karlmenn hverfisins verði haldnir óeðlilega miklum losta og...    Nú skil ég málið, karlinn hennar er farinn að "berja að dyrum" án þess að hann eigi afmæli og það náttúrulega gengur ekki.

Bikíníklædd Beyonce veldur uppnámi í Las Vegas

Góð lausn og algeng erlendis.

Á ferðum mínum á Spáni og í Englandi rakst ég á nokkur svona hringtorg og furðaði mig á að þetta væri ekki gert hérna heima enda nýtir þetta landið betur en margar þær lausnir sem hér eru notaðar.

Vona að þessi lausn verði notuð á fleiri stöðum hér heima.

Hringtorg á efri hæðinni

Gatnamót Bústaðavegar og Reykjanesbrautar

 Það er búið að fjalla nokkuð mikið um gatnamót Bústaðavegar og Reykjanesbrautar, hvað ekki má skemma dalinn þarna og svo framvegis.  Það er búið að útiloka göng því þau færu út í dal og það er búið að útiloka brú af sömu ástæðu.

En í allri þessari umræðu hef ég ekki enn heyrt um útfærsluna hér til vinstri en í henni er gert ráð fyrir að brú sé byggð á milli núverandi akreina og leyst úr akstursstefnumálum með hringtorgi. Myndin hér til vinstri sýnir mögulegar akstursleiðir en er ekki að reyna að sýna útfærslu á brú að öðru leyti.

Myndin er fengin úr Borgarvefsjá og síðan breytt.

 [Bætt við 7. nóvember 2007 kl.19:27 - Auðvitað væri ódýrast að banna vinstri beygju á þessum gatnamótum á milli 07:00 og 10:00 og á milli 15:30 og 18:30 virka daga og setja bara ljósaskilti sem gefa það í skyn. ]

Maður sem vinnur yfirvinnu er með hærri heildarlaun en kona sem vinnur enga yfirvinnu.

Ég væri til í að fá svart á hvítu hvað launamunurinn er í raun og veru, að bera saman heildarlaun segir ekki hálfa söguna. Ég veit að munur er á launum karla og kvenna og því skil ég ekki þessa áráttu að bólstra þennan mun með því að taka ekki tillit til UNNINNA yfirvinnutíma.

Fáum sannleikann á borðið svo við getum gert eitthvað í málinu.

Félagskonur SFR með 25% lægri heildarlaun en karlar

Frítt í strætó fyrir alla og vandinn er leystur.

Á Akureyri og á Suðurnesjum er frítt í strætó með góðum árangri, af hverju ekki á höfuðborgarsvæðinu?

Kostnaður við innheimtu og eftirlit ásamt utanumhaldi um kortin er hár og efast ég um að fargjöldin dugi fyrir þeim kostnaði, og jafnvel þó svo sé þá má ætla að þjóðfélagslegur sparnaður af því að fleiri taki strætó sé það mikill að það sé út í hött að hafa ekki frítt í vagnana.

Svindl með strætókort stóreykst

Fjármagnstekjuskattsmálið

Ég legg til að þetta fjármagnstekjuskattsmál verði leyst á eftirfarandi hátt:
 
Fyrst er ákveðin viðmiðunarupphæð, köllum það útsvarstekjumark , t.d. 3.000.000kr á ári. Af þeirri tölu er síðan reiknuð útsvarsmark hvers sveitarfélags fyrir sig út frá þeirra útsvarsprósentu.
 
Hefðbundið útsvar gengi að fullu upp í þetta útsvarsmark, til að greiða það sem á vantar skal nota 80% fjármagnstekjuskatts, og svo gengur 1% af fjármagnstekjuskatti að auki til sveitarfélagsins. Sjá dæmi hér fyrir neðan.
 
Vegið meðaltal útsvars er 12,97% og því myndi útsvarsmark verða 389.100kr.
 
Ímyndum okkur mann með launatekjur upp á 1.800.000kr en fjármagnstekjur upp á 10.000.000kr,
Hefðbundið útsvar yrði 74.698kr en fjármagnstekjuskattur 1.000.000kr.
 
Samkvæmt ofangreindum forsendum mínum á þessi maður eftir að borga 314.402kr í útsvar, það þýðir að fyrstu 393.003kr. fjármagnstekjuskatts fara að mestu til sveitarfélags, eða fyrrgreindar 314.402kr, og að afgangurinn, 606.997kr, skiptast þannig að sveitarfélagið fær 6.070kr og ríkið 600.927kr.
 
Þannig fær sveitarfélagið 395.170.660kr í útsvar frá þessum manni í stað 74.698kr áður, og ríkið fær 810.553kr í fjármagnstekjuskatt í stað 1.000.000kr áður, ásamt tekjuskattinum sem er 131.025kr.
 

Annað dæmi, kona með 400.000kr í mánaðartekjur og 600.000kr í fjármagnstekjur á ári.
Hefðbundið útsvar yrði 432.670kr en fjármagnstekjuskattur 60.000kr.
 
Þessi kona er nú búin að greiða meira en útsvarsmarkið og því fær sveitarfélagið aðeins 1% af fjármagnstekjuskattinum, 600kr.
 
Þannig fær sveitarfélagið 433.270kr í útsvar frá þessari konu sem er aðeins 600kr hærra en áður, og ríkið fær 59.400kr í fjármagnstekjuskatt í stað 60.000kr áður, ásamt tekjuskattinum sem er 758.925kr.
 
Skattar manneskju sem er bara með fjármagnstekjur en engar launatekjur myndi skiptast þannig að fyrst yrði sveitarfélaginu tryggðar tekjur en svo myndi ríkið taka við.
 
Þannig myndi manneskja með 5.000.000kr fjármagnstekjur borga 110.764kr til ríkis og 389.236kr til sveitarfélags en manneskja með 15.000.000kr fjármagnstekjur borga 1.100.764kr til ríkis og 399.236kr til sveitarfélags.
 
Allar ofangreindar tölur miðast við að 4% skyldulífeyri og 4% viðbótarlífeyrissparnað.
 
Eflaust má hræra eitthvað í þessum prósentutölum svo allir verði ánægðir.
 
Með þessu móti er sveitarfélögunum tryggðar tekjur af þeim sem hafa engar aðrar tekjur en fjármagnstekjur og einnig smávegis aukreitis frá þeim sem hafa mjög háar fjármagnstekjur. Þetta hefur ekki í för með sér neinar breytingar fyrir gjaldendur aðrar en þær að þeir sem hafa bara fjármagnstekjur þurfa ekki lengur að skammast sín fyrir að borga ekkert til síns sveitarfélags.

Skrár tengdar þessari bloggfærslu:

• Útreikningar í Excel

Notarðu ekki belti, Ólafur?

Í viðtali Sjónvarpsins í kvöld um borð í nýja bílnum var fréttamaður Sjónvarpsins í belti en forseti lýðveldisins ekki. Ekki til fyrirmyndar, vona að það hafi verið einsdæmi.

Bíllinn er fjórhjóladrifinn með 5 lítra V8 bensínvél og eyðir um 11 á hundraðið í blönduðum akstri. Bíllinn er samtals 438 hestöfl og er 5,5 sekúndur í hundraðið. Bíllinn getur lagt sér sjálfur ef ökumaðurinn velur stæðið og stjórnar hraðanum með bremsunni. Forsetinn ætti líka að geta notið tónlistar í bílnum sem er með Mark Levinson Reference Surround Sound kerfi með 19 hátölurum.

Minns langar í svona burra.

Forsetaembættið fær umhverfisvænan bíl

Staðreyndavillur

"Verið er að fylla þyrlurnar TF-LÍF og TF-BRÁ af bensíni í Kulusuk áður en þær snúa aftur til landsins."

Super Puma þyrlur Landhelgisgæslunnar hafa einkennisstafina TF-LÍF og TF-GNÁ (leiguvél frá Noregi). Ennfremur nota þessar þyrlur ekki bensín heldur JET A-1 þotueldsneyti.

Þremur bjargað úr báti föstum í ís

Það sem er bannað má ef það gera það nógu margir.

Mér finnst það nú nokkuð skrítið að það skuli hafa orðið til refsilækkunar að gjótan hafi verið notuð til þessa áður.

Ég veit ekki til þess að maður geti sloppið við refsingu fyrir hraðakstur á t.d. Reykjanesbrautinni vegna þess að það eru svo margir sem keyra of hratt þar.

Heldur hefði átt að gefa fordæmi í þessu máli og dæma til hámarksrefsingar.

Losaði seyru úr tankbíl í hraungjótu

Í tengdum fréttum: Mjólkurbú Flóamanna og Skýrr sameinast.

Einnig sameinuðust í dag Íslensk erfðagreining og Sóma-samlokur, í kjölfarið sameinuðust Tóbaksbúðin Björk og Leikskólinn Fálkaborg. Einnig má geta þess að Brimborg og Sláturfélag Suðurlands eru í sameiningarviðræðum og að Actavis og Húsasmiðjan munu frá næstu mánaðarmótum heita Húsavis.

Skjárinn og Já í eitt félag